एमसीसी अन्योलमा : यथास्थितिमा पास नगर्न नेकपा कार्यदलको सुझाब

एमसीसी अन्योलमा  : यथास्थितिमा पास नगर्न नेकपा कार्यदलको सुझाब

काठमाडौं :  अमेरिकी नियोग मिलेनियम च्यालेन्ज कर्पोरेसन (एमसिसी)यथास्थितिमै संसद्‌बाट अनुमोदन नगर्न नेकपाको कार्यदलले सुझाब दिएको छ ।

वरिष्ठ नेता झलनाथ खनाल नेतृत्वको कार्यदलले शुक्रबार साँझ पार्टी अध्यक्षद्वय केपी ओली र पुष्पकमल दाहाल प्रचण्डलाई बुझाएको ५७ पृष्ठको प्रतिवेदनमा एमसिसीमा दर्जनौं गम्भीर र आपत्तिजनक बुँदा रहेकाले नसच्चाई पारित नगर्न सुझाब दिइएको छ ।

यससँगै एमसिसीको भविष्य अन्योलमा परेको छ ।

‘एमसिसी सम्झौता र यससँग जोडिएका सहायक सम्झौताको बृहत् अध्ययनपछि हामी एमसिसी जस्ताको त्यस्तै पारित हुन सक्दैन भन्ने निष्कर्षमा पुगेका छौं । यसमा दर्जनौँ गम्भीर र आपत्तिजनक बुँदा समेटिएका रहेछन् । अहिलेसम्म कसले के हेरेर, के पढेर, के बुझेर पास गर्नुपर्छ भनेका रहेछन्, हामी आश्चर्यमा पर्यौं,’ प्रतिवेदन बुझाएपछि कार्यदल संयोजक झलनाथ खनालले भने, ‘जस्ताको त्यस्तै पारित गर्‍यो भने राष्ट्रिय स्वाधीनता, सार्वभौमसत्ता र अखण्डतामा आँच पुग्छ भन्ने हाम्रो निष्कर्ष रह्यो ।’

खनालका अनुसार न्युयोर्कको कानुन नेपालमा लागू हुनेछन् भन्नेसम्मको व्यवस्था एमसिसीमा रहेको खबर आजको नयाँ पत्रिका दैनिकमा नेत्र पन्थीले लेखेका छन् ।